Views: 194

Mu karere ka Musanze, mu murenge wa Cyuve, Akagari ka Bukinanyana, mu mudugudu wa Mwirongi hari umuturage witwa Nkurikiyinka Emmanuel ubarizwa mu cyiciro cya mbere cy’ubudehe, uvuga ko amaze imyaka irenga itanu anyagirwa mu gihe ubuyobozi bw’umurenge buhora bumubeshya ko buzamwubakira none asigaye yihengetse mu gakoni ka metero imwe kuri imwe.

Nkurikiyinka Emmanuel umusaza uvuga ko yafashwa akavanwa Muri iyi nzu
Ubwo umunyamakuru wa Rwandatoday yageraga mu murenge wa Cyuve aho uyu musaza Nkurikiyinka w’imyaka 72 atuye, yasanze aba mu kazu k’igikoni gafatanye n’iyangijwe n’imvura amubwira ko ubuyobozi bwagiye bumwizeza kumwubakira ariko amaso yaheze mu kirere.
Nkurikiyinka Emmanuel yagize ati, “Maze imyaka irenga itanu inzu nabagamo isenywe n’imvura y’urubura, bikimara kuba gitifu w’akagari yaransuye ambwira ko bazanyubakira none amaso yaheze mu kirere kugeza n’uyu munsi. Ubu ndara muri aka gakoni kameze nk’ubwiherero.”
Uyu muturage akomeza agira ati, “Mu kwezi kwa Kane muri 2019 baraje bashyira insinga z’amashanyarazi ku nzu, bambeshya ko bazajya bancanira none dore ibi byuma byashaje bidakozwe na rimwe, keretse umubyeyi wacu Paul Kagame agize uko andengera nkabona aho kurambika umusaya n’aho ubundi baranyirengagije kandi urabona ko namugaye ukuguru.”
manizabayo Alphonsina yagize ati, “Uyu musaza ubuzima bwe bumeze nabi, mwabonye kariya gakoni niko abamo inzu ye yarasenyutse ubwo ajya kuba muri kariya gakoni, mwabonye ko amashyiga ari munsi y’uburiri, mbese Leta imurwanyeho yamusanira iyi nzu akabaho nk’abandi”.
Twifuje kumenya icyo ubuyobozi bw’Umurenge wa Cyuve buvuga kuri iki kibazo maze Umunyamabanga Nshingwabikorwa w’Umurenge, Gahonzire Landuard avuga ko agiye kureba niba uyu muturage nawe yarashyizwe ku rutonde rw’abazubakirwa basenyewe n’ibiza.
Yagize ati “Ndaza kureba niba uwo muturage ari ku rutonde rw’abazubakirwa basenyewe n’ibiza hanyuma nawe igihe nikigera tuzamwubakire.”
Uyu muyobozi akomeza avuga ko nibabona hantu uwo muturage ari hatameze neza baazaba tumushakiye aho kuba mu gihe atarubakirwa.
Benshi mu baturanyi b’uyu muryango bakomeza bibaza niba kuri iyi nshuro bazabikora cyane ko n’ubundi mu myaka itanu ishyize bari bizeye ko ubuvugizi bugiye gukorwa ariko bigaherera iyo kugeza uyu munsi ntakirakorwa.
Source:Mamaurwagasabo.rw
SHARE WITH US

By Edouard Nsengiyumva

Umunyamakuru umaze imyaka 7 akora itangazamakuru https://web.facebook.com/me/

Leave a Reply

Your email address will not be published.