Views: 128

Umutwe wa M23 washinje Guverinoma ya Repubulika ya Demokarasi ya Congo guhembera Jenoside, aho mu bice bya Masisi yategetse Abatutsi bose kujya mu mavuriro cyangwa za paruwasi, uwo bazasanga hanze akazafatwa nk’umwe mu bagize uyu mutwe leta yita uw’iterabwoba.

Ibi birego bya M23 bikubiye mu itangazo yasohoye kuri uyu wa Kabiri tariki 22 Ugushyingo 2022. Rije mu gihe ikomeje guhangana n’Ingabo za Leta mu rugamba rwatumye uyu mutwe wigarurira uduce twinshi.

Uyu mutwe waashinje Guverinoma kugira uruhare mu bikorwa byinshi usanga bigambiriye kurimbura Abatutsi bo muri Congo.

Wagize uti “Urugero nko muri Masisi. Iryo huriro ryasabye Abanye-Congo bose bo mu bwoko bw’Abatutsi guhurira mu mavuriro cyangwa za paruwasi. Abatazagaragara aho hantu bazafatwa nk’abagize M23 bityo bashobora kwicwa.”

“Mu duce twuiganjemo Abatutsi, abasirikare ba FARDC barahavuye, bahategeza abambari babo ba FDLR na Mai Mai ngo bakore ibyo bazi gukora neza, Jenoside.”

Ni uburyo uyu mutwe uvuga ko busa n’ubwakoreshejwe n’Interahamwe mu Rwanda, zishaka kurimbura Abatutsi muri Jenoside mu 1994.

Uyu mutwe uvuga ko mu gushaka gusohoza uwo mugambi, Guverinoma ya RDC yanashyizeho Brig Gen Mugabo Hassan nk’umuyobozi ushinzwe ibikorwa bya gisirikare muri Masisi.

Nimu gihe ngo ashinjwa ibyaha ndengakamere yakoze akiba mu mutwe witwaje intwaro wa PARECO, akaba anafite imikoranire yihariye na FDLR.

M23 ivuga ko yiteguye kugirana imishyikirano na Leta ya Congo, hagamijwe gushyira iherezo kuri izi ntambara zimaze imyaka myinshi.

Ni mu gihe Leta ya Congo yo ivuga ko ititeguye kuganira n’uyu mutwe mu gihe cyose utaravana ingabo mu duce wigaruriye.

Kugeza ubu Leta ishaka gukemura iki kibazo mu buryo bwa gisirikare, yifashishije ingabo zirimo koherezwa mu burasirazuba bwa RDC, zivuye mu bihugu bigize Umuryango wa Afurika y’Iburasirazuba.

SHARE WITH US

Leave a Reply

Your email address will not be published. Required fields are marked *